Sila Kirukkalgal

சிக்னல் காத்திருப்பில்
புன்னகைத்த ஆட்டோ டிரைவர் 
முன் பின் தெரியாதவர் என்றாலும் 
பிரதிபலித்த புன்முறுவலில் 
சிநேகமும் உண்மையும் இருந்தது 
****
அரசுப் பேருந்தில்
முன் இருக்கைக் குழந்தை
அம்மாவை மீறி
கை நீட்டிக் குதூகலித்த போது
லேசான ஹிருதயத்தில்
இறைத் தன்மை
வியாபித்திருந்தது
****
பள்ளிப் பிராயத்தில்
அன்பை மாத்திரமே
தண்டனையாய்த் தந்து வந்த 
பேர் மறந்து போனாலும் 
முகம் பதிந்த ஆசிரியை 
உறக்கம் வராத பின்னிரவில்    
காரணங்கள் தெரியாமல்
ஞாபகத்தில் வந்து போகும்
நெகிழ்வான தருணத்தில்
காதலின் அர்த்தம்
புரிந்த மாதிரி இருந்தது

சொக்ஸ்